Grinud në “mëdyshje”, për “djallin” interesohen Roma dhe “gjigandët” sauditë

Mejson Grinud pritet që t’i bashkohet kolonisë së “yjeve” në Arabinë Saudite. Pas largimit nga United, mediat angleze raportojnë se për futbollistin ka mbërritur një ofertë prej 10 milionë paundësh në sezon nga skuadra e Al-Etifak. “Djajtë e kuq” e nxorrën jashtë planeve 21-vjeçarin dhe pavarësisht se akuzat e ngritura për tentativë përdhunimi ranë, lojtari nuk shihet më si pjesë e projektit.

Sulmuesi pranoi vendimin e klubit e tani sheh opsionet që i ofrohen. Klubi arab është gati që t’i bëjë vend në skuadër, kjo dhe për faktin se trajneri Stivën Zherrard kërkon përforcime. Pjesë e skuadrës së Al-Etifak është dhe ish-lojtari i Liverpul, Xhordan Henderson. United nuk ka dhënë detaje nëse do të ndërpresë bashkëpunimin me lojtarin apo do ta huazojë atë, kjo për shkak se Grinud ka kontratë deri në vititn 2025. Për shërbimet e tij ka interes dhe nga Italia, me Romën që e ka në listën e dëshirave, ndërkohë që dhe nga Turqia është skuadra e Gallatasaraj, që mund t’i bëjë vend në ekip. Merkato në Evropë mbyllet në datën 1 shtator, ndërkohë që skuadrat arabe duken më të avantazhuara, pasi dritarja e transferimeve atje vijon deri në datën 20 të muajit të ardhshëm

sfidanti.al