Të gjithë qahen nga arbitrat në Superligë, edhe të humburit edhe të fituarit! Të gjithë bëjnë sikur nuk e dinë që kartat e lojës  trazohen  lart nëpër zyra, kurse ajo e fushës është maskë që na mbron ..kundër futbollit të ndershëm! Një maskë  që na është bërë pjesë e fytyrës  dhe nuk na shqitet  dot.   Dhe në një teatër të tillë grotesk , ku rebelimi është i komanduar ,  të gjithë shkarkojnë tek arbitrat . Kur të gjithë e dinë se ka një arbitër të madh që kurdis arbitrat e vegjël…

Ku tjetër, në cilën parajsë futbollit, veç Superligës,   do të dilte me një shkrim “denoncues”  vetë  disenjator i arbitrave, siç ndodhi me Sokol  Jarecin, duke treguar sekretin që e dinë të gjithë  : “ Presidentët i kërcënojnë  arbitrat  edhe me jetë”.  Pse pikërisht në këto momente del një deklaratë e tillë ? Mos  vallë ka lidhje me atë që do të ndodhin  në javën që do  të pasojnë..?  Dikur thonim shyqyr që i kemi se futbolli po i ha paratë e shtëpisë,  kurse tani zbulojmë zyrtarisht se  “vrasin arbitra” me telefon!   Mirë që dhunuesit na ikin gjithnjë në adresë të panjohur, s’kanë emra dhe bëmat  e tyre tregohen si përralla, por ky zoti Jareci tenton të na bëjë një finte të rrezikshme…

Arbitrat gabokan nga frika e presidentëve të klubeve , pra virusi nuk është brënda në FSHF, por vjen nga jashtë. Sipas “profesor” Jarecit , uji që pijnë arbitrat del i kulluar nga “burimi”  që komandohet nga çunat e sistemit, por turbullohet poshtë nga pisllëqet e klubeve.  Kjo po që është …haleluja!  Si mund të mendohet  se anëtari i Komitetit të Ekzekutiv të UEFA-s,  apo presidenti me titull “Honoris Causa”,  zoti Duka , të ulet aq poshtë,  në batakun e marifetit të arbitrave,(  për Kombëtaren ia vlen)  për të kurdisur intrigën se cilët do të marrin trofetë dhe cilët do të marrin rrugët…

Sfidanti.al