Kur të më shikoni se jam tretur, mos kujtoni se kam vdekur!  Kjo frazë doli nga muzeu dhe  tingëllon tejet aktuale, pasi dëgjon deklaratën sfiduese të presidentit të Skënderbeut, Takaj. “ Nuk e di se cili i ka ato b… për të marrë trajnerin e Skënderbeut. Keni dëgjuar ndonjëherë në këto 8 vite që një klub tjetër t’i marrë Skënderbeut..trajnerin”. Gjithë këto ditë është përfolur se Tirana dhe Partizani , pasi mbaruan punë në Derbi,  kanë një një “luftë”  tjetër për të bërë , fati i së cilës nuk varet vetëm prej tyre .  Sikur Ilir Daja të ketë shkopin magjik, ose sikur të bekohet si  “Guardiola” e shqipeve , meqë paska dalë kampion me tre ekipe të ndryshme,  Partizani shpreson se me të mund të ruajë petkun e titullit kampion, ndërsa Tirana synon altarin e fronit, për të festuar ditlindjen e madhe…

Deklarata e presidentit Takaj, duket  mëse shqiptare: “ Tundni paratë, pastaj hajdeni merrni trajnerin”.  Morali i deklaratës të kujton fabulën : nuk ka qofte te Daja ! Skënderbeut, edhe pse duket se i është fikur drita e së ardhmes pas dënimit maratonë në Europë,  qoftë Partizani, qoftë Tirana, nuk mund t’i marrin në mes të ditës trajnerin.Trajnerin, që  po të besosh në ato që thuhen poshtë e lart, mund të bëhet si “Helena e Trojës”, sebepi i luftës midis tre klubeve. Dhe në një kohë të trazuar,  kur  është shtuar ndejshem hemoragjia për shkarkimin e trajnerëve , madje stolat po mbushen me trajnerë “nxënës”, emri i Dajës duket si një ngushëllim i fundit  për njerëzit e këtij zanati…

Sfidanti.al