Në jetë ndodh edhe kështu, ndaj duhet durim. Dhjetë herë më shumë rrogë do të marrë Tomas Strakosha tek Lacio, duke nisur që tani. Portieri i kombëtares shqiptare rinovoi kontratën me klubin e Serisë A dhe paraqitja e tij shumë e mirë u shpërblye.

Njëzetedyvjeçari do të fitojë një rrogë afërsisht 1 milionë euro në sezon në një marrëveshje që vlen deri në vitin 2022, në krahasim me 100 mijë euro në vit që e kishte pagën deri tani. Vlerësim i shkëlqyer, por i merituar për një djalë të ri që erdhi pa pretendime nga Greqia, por që priti momentin e tij. U ndihmua nga largimi i Etrit Berishës tek Atalanta, ndërsa e fitoi bindshëm konkurrimin me titullarin e padiskutuar, Federiko Marketi.

Mediat italiane vlerësojnë lart jo vetëm Strakoshën, por edhe drejtorin sportiv të Lacios, Igli Taren, i cili vitet e fundit ka bërë goditje të mëdha. Portierin e mori me parametër zero në vitin 2012 nga Panioniosi, ndërsa tani kartoni i tij ka kapur shifra të rëndësishme. Rinovim kontrate edhe për Çiro Imobilen, sulmuesin më të mirë italian të momentit. Sulmuesi 27-vjeçar, i marrë nga Tare vetëm për 9.5 milionë euro nga Sevilja, do të përfitojë rreth 3 milionë euro në vit.

Sfidanti.al