Në një kohë krize, askush nuk mund të rrijë pa shkuar në “front”. Futbolli italian pati nevojë më shumë se kurrë për Mario Balotelin, ndërsa kombëtarja e kaltër ndihet e varfër duke mos pasur yjet e së kaluarës. U desh ardhja e trajnerit Roberto Mançini që SuperMario të rifitonte vendin në përfaqësuese, dhe menjëherë ia shpërbleu atij me gol.
Sulmuesi i Nisës shënoi ndaj Arabisë Saudite, në miqësoren e luajtur në Sent Galen të Zvicrës, dhe që përfundoi 2-1 për të kaltrit (Beloti dhe Al Shehri ishin autorë të golave të tjerë). Gjithsesi, kriza e Italisë duket nga fakti që në Botërorin e Rusisë do të jetë Arabia Saudite dhe jo ajo, pesë herë kampione e Botës.
Mançini tregoi se është një trajner me karakter që mund të marrë vendimet e duhura, edhe pse të vështira, pasi Baloteli për shumë kohë është njohur si “djali i keq” i futbollit. Ai shpërdoroi karrierën tek Interi, Milani apo Mançester Siti, madje duke pasur edhe sherre me Mançinin, veçse në dy sezonet e fundit, u tregua ndryshe në Francë. Ai shënoi 26 gola për Nisën edicionin e fundit, në të gjithë kompeticionet, ndërsa Manço vendosi të mos ecte me opinion.
Sfidanti.al