Është shumë më i qetë për të vendosur tani që realizoi misionin më të vështirë të jetës së tij sportive. Lionel Mesi nuk vonoi shumë që të jepte sinjalin për vazhdimin e karrierës e duket se do të ketë sërish “fluturim” në nivelet më të larta pasi lajmet janë që kampioni i botës pranon rinovimin me Paris SG. As nuk bëhet fjalë për një kalim të Atlantikut tek Interi i Majemit. Me gjithë respektin për vendin e madh, SHBA-në, dhe kampionatin që po forcohet, Mesi nuk dëshiron të dalë në pension as tani në moshën 35-vjeçare! Në fund të fundit, pse është Topi i Artë i Botërorit? Po ashtu, kapitulli “Barcelonë” duket se është mbyllur një herë e përgjithmonë. Siç thuhet, “buka e thyer, nuk ngjitet më”. Tek PSG-ja, superylli mund të luajë të paktën edhe sezonin e ardhshëm, e më pas të ndjekë shembullin e Luka Modriçit që rinovon vit pas viti me Realin. Mesi ka ende objektiva, që nga fitimi i Topit të Artë të 8-të në karrierë, tek fitorja e Championsit, që do ta bënte me 5 trofe si Ronaldo, si edhe mjaft të tjera.

Sfidanti.al