Pioli: Milani e tregoi veten atëherë kur duhej!

Ishte një rast për të treguar veten, ndonëse më parë shanse të tilla ishin humbur. Gjithsesi, kur flasim për Serinë A, Milani shfaqet serioz në momentet kyçe e ndonëse këtë vit nuk fitoi titullin siç bëri vjet, arriti një objektiv tepër të rëndësishëm. Me fitoren 1-0 në fushën e Juventusit u sigurua kualifikimi për në Champions sezonin e ardhshëm, që përkthehet në dhjetëra milionë euro të ardhura, dhe në mundësi për të mbajtur yjet. Mjaftoi një gol i të zakonshmit Olivie Zhiru për të mundur një Juve të lodhur, në një nga sfidat tipike të fundit të sezonit. Pas eliminimit të hidhur e bindës në Ligën e Kampionëve nga Interi, ish-kampionët e Italisë kanë tani një motiv për t’u krenuar, në një sezon të vështirë.

“Ishte një rast i madh për të treguar se kush jemi dhe sesa të mirë jemi, – tha Pioli, – Milani është një skuadër e fortë dhe e tregon veten në sfida të caktuara, edhe pse nuk jemi plotësisht të kënaqur. Kemi bërë një Champions të jashtëzakonshëm, kuptohet me zhgënjimin e madh që u eliminuam në gjysmëfinale. Në kampionat kemi qenë të mjaftueshëm, por duke qenë të ngarkuar kemi lënë diçka rrugës”.

Sfidanti.al