Sa më shumë zhytej “këmba e Derbit” në baltovinën e fushës së stadiumit “Air Albania”, aq më shumë largohet nga balta  emri i presidentit Duka. Tamam në ditën kur fusha u shfaq me një pamje më shumë se mjerane, pasi gropave dhe plisave në njërën anë të fushës u bënte shoqëri dhe një “kanal vaditës” në anën tjetër, u shtup butoni për të dhënë një sihariq. Tamam si në epilog  të bojkotit, kur  thanë se gjetën klientin që po kërkonin prej vitesh,  për të blerë  emrin e Superligës!

Lajmi që “mbushi gropat” e fushës u shfaq  i tillë :  Në këtë stadium,  kur të mbijë bari dhe të bëhet fusha e re, që do të jetë edhe ajo më “ e bukura në Ballkan” si vetë stadiumi,  do të luhet një finale europiane! Pasi u lodhëm me përralllën  e një Superkupe të Europës, tani kemi gjetur një finale  ngushëlluese me emrin .. Konferencë Ligë.

Dëgjoni trajnerin Edi Reja, trajnerin e Kombëtares, i cili ka harruar se  vetëm pak ditë më parë,  doli publikisht dhe tha se ishte gati të shkonte edhe me vrap në Elbasan, bashkë me ekipin e tij, vetëm që të mos luante në fushën mjerane të “Air Albanias” kundër  Bjellorusisë. “Të organizosh një finale të tillë si Konferencë Liga, në stadiumin e ri që është një xhevair, do të thotë shumë për imazhin e Shqipërisë.  Presidenti Duka ka krijuar raporte ndërkombëtarisht dhe UEFA ka besim te projekti i Shqipërisë..” Bravo profesor, xhevair stadiumi, xhevair dhe..presidenti!

Që UEFA ka besim tek ne, këtë e  kanë mësuar  të gjithë,   i dashur profesor Reja. UEFA na është gjëndur gjithmonë në ditë të vështira : kur dënoi Skënderbeun me 10 vite, na qetësoi shpirtin kur  presidentin Duka, e pranoi  si anetar te Komitetit Ekzekutiv. Pale kur  futbolli u fut në “grevë urie” për 8 javë  për shkak të bojkotit, nuk do te harrohen  “çunat e UEFA-s”  kur fusnin ushqime fshehurazi  tek çadra e FSHF-së…

Sfidanti.al