Mercedesi mbetet sërish makina për t’u mundur, edhe pse Red Bulli është shumë pranë. Një pilot si Ljuis Hamilton është në “elementët” e tij në kushte të tilla gare, sidomos kur duhet të parakalojë e të mbrohet fort, siç ndodhi në Çmimin e Madh të Portugalisë. Kampioni i botës në fuqi u parakalua për një moment nga Maks Verstapen, pastaj e kaloi holandezin, u mbrojt mirë disa herë, ndërsa kaloi edhe shokun e skuadrës, Valteri Botasin, për t’u shkëputur në fund. Ai la pas Verstapenin me plot 29 sekonda diferencë, ndërsa Botasi mbeti 4 sekonda prapa holandezit. Finlandezi mori pikën për xhiron më të shpejtë, pasi ajo iu hoq Verstapenit sepse shkeli kufijtë e pistës. Pas 3 garave të para, Hamilton ka dy fitore e një vend të dytë.  Shtatë herë kampioni i botës ka 69 pikë ndaj 61 të Verstapenit dhe 37 të Lando Norrisit. Botasi është i katërti me 32. Mercedesi kryeson me 101 pikë ndaj 83 të Red Bullit e 53 të Meklarenit.

Sfidanti.al