Manchester United po përjeton një krizë të theksuar në repartin mbrojtës. Barazimi spektakolar 4-4 ndaj Aston Villës ishte një tjetër dëshmi e problemeve të mëdha që kanë shoqëruar skuadrën këtë sezon, ndërsa një statistikë tregon qartë përmasat e kaosit: Michael Carrick ka përdorur plot 11 kombinime të ndryshme në vijën e mbrojtjes në vetëm 15 ndeshje.
Situata bëhet edhe më shqetësuese kur shihen golat e pësuar. United ka lejuar 30 gola në 15 takime, duke pasur vetëm një portë të paprekur, në ndeshjen ndaj Sabahut më 7 shtator. Në pesë ndeshjet e fundit, skuadra është gjendur në disavantazhin 0-2, ndërsa ka pësuar gola edhe në përballjet ku kundërshtarët kanë mbetur me një lojtar më pak.
Pavarësisht këtyre statistikave alarmante, Manchester United nuk afroi asnjë mbrojtës gjatë merkatos së verës. Një nga problemet kryesore lidhet me gjendjen fizike të Luke Shaw, i cili ka humbur shtatë ndeshjet e fundit. Për shkak të mungesave të tij, Carrick është detyruar të aktivizojë në krahun e majtë Patrick Dorgun, Diogo Dalotin, Noussair Mazraouin dhe Ayden Heaven. Asnjëri prej tyre nuk është një mbrojtës i mirëfilltë i majtë. Ndërkohë, Harry Amass, i cili luan natyrshëm në këtë pozicion, nuk ka regjistruar ende asnjë aktivizim si titullar dhe vazhdon të mbetet jashtë planeve të trajnerit. Situata e tij në klub është bërë edhe më e paqartë për shkak të ndryshimeve të agjentëve gjatë këtij sezoni.
Një mbrojtje që ndryshon nga ndeshja në ndeshje
Kombinimi i vetëm që Carrick ka përdorur tri herë përbëhet nga Dalot, Harry Maguire, Lisandro Martinez dhe Luke Shaw. Kjo katërshe u aktivizua ndaj Ipswich, Everton dhe Fulham, duke mos pësuar humbje, por Shaw u zëvendësua në të tria ndeshjet.
Problemet u thelluan gjatë periudhës mes dy pushimeve të kombëtareve. Në humbjen 3-0 ndaj Bournemouth, mbrojtësi qendror Leny Yoro u aktivizua në krahun e djathtë, ndërsa Dalot, i cili luan zakonisht në të njëjtin pozicion, u vendos në të majtë.
Yoro ka luajtur pesë herë si mbrojtës i djathtë, edhe pse United ka pasur alternativa natyrale për atë pozicion. Francezi ka theksuar vazhdimisht se preferon të luajë në qendër të mbrojtjes.
Edhe Heaven është shndërruar në një alternativë problematike. Ai u aktivizua në krahun e majtë, ndërsa në ndeshjen hapëse ndaj Hullit pati vështirësi përballë sulmuesit Oli McBurnie. Në disa raste, gabimet individuale dhe mungesa e harmonisë mes mbrojtësve i kanë kushtuar shtrenjtë skuadrës.
Mungon edhe mburoja para mbrojtjes
Problemet nuk kufizohen vetëm te katërshja e fundit. Manchester United ka vuajtur gjithashtu mungesën e një mesfushori defensiv që të mbrojë repartin e prapavijës. Carlos Baleba, i cili ishte objektiv për këtë rol, u bashkua me skuadrën vetëm në fazën e fundit të merkatos dhe më pas u dëmtua.
Mesfushori pritet të qëndrojë jashtë fushave të paktën deri në pjesën e dytë të dhjetorit, duke lënë një tjetër boshllëk të rëndësishëm në skuadër.
Edhe portieri Senne Lammens ka nisur të shfaqë pasiguri, duke pësuar gola që në rrethana të tjera mund të ishin shmangur. Për këtë arsye, presioni mbi të gjithë repartin defensiv është shtuar ndjeshëm.
Në perspektivë, vera e ardhshme mund të sjellë një revolucion në mbrojtjen e United. Kontratat e Shaw, Martinez dhe Maguire mund të mos rinovohen, ndërsa Dalot dhe Mazraoui do të hyjnë në vitin e fundit të marrëveshjeve të tyre.
