Unai Emeri mund të kritikohet për atë që bëri tek Arsenali, por nuk mund të quhet një trajner i keq. Si mund të jetë i tillë një njeri që fiton 4 herë Ligën e Europës, dhe që vazhdon të shkëlqejë në këtë kompeticion? Suksesi i radhës edhe pas gjuajtjeve të penalltive, në një finale të vështirë ndaj Mançester Junajtidit, ku Vijarreali i tij doli përmbi parashikimet që e cilësonin humbës. U deshën 120’ lojë, u deshën 22 penallti, por çfarë pastaj? Përfundimi ishte triumfi me kupën e ngritur në qiell, diçka që nuk arriti ta bënte vetëm në 2019 me Arsenalin, të cilin gjithsesi e nxorri në finalen e humbur 1-4 me Çelsin.
Në një ndeshje aspak të bukur, të ashpër dhe me lojë taktike, sidomos me stilin “bunker” nga spanjollët, fitoi ai që pati nerva më të forta, padyshim edhe fat. Vetëm 3 gjuajtje ishin në kuadrat, me spanjollët që gjuajtën vetëm një herë dhe shënuan, ndërsa Junajtidi pati epërsi në zotërimin e topit me 60 për qind. Gerard Moreno kaloi spanjollët në epërsi në 29’, në të kundërt me rrjedhën e lojës, ndërsa Edinson Kavani barazoi në 55’. Anglezët humbën raste të pastër, sidomos me Grinvudin e Kavanin, ndërsa tek gjuajtjet e penalltive gaboi vetëm njëri, dhe ky ishte portieri i Junajtidit, David De Gea.
Kritikat ishin të mëdha për yjet kryesorë të “djajve të kuq” që nuk arritën nivelin e pritshëm, sidomos Pogba, Bruno Fernandes apo Rashford. Mektominai ishte më i miri në fushë për ekipin e Ole Gunar Solskjerit, që nuk e imitoi dot Zhoze Murinjon që fitoi trofeun e fundit europian për Mançester Junajtidin, në 2017 e pikërisht Ligën e Europës në finalen e fituar 2-0 ndaj Ajaksit.
Vijarreal: Ruji, Fojth (Perez Martinez 88’), Albiol, Torres, Pedraza (Moreno 88’), Pino (Alkaser 77’), Kapue (Rabaseda Antolin 120’+3), Pareho, Trigeros Munjoz (Gomez Bardonado 77’), Moreno, Baka (Kokelen 60’). Tr. Unai Emeri
Mançester Junajtid; De Gea, Uan Bisaka (Mata 120’+3), Bejli (Tuanzebe 116’), Lindelof, Shou, Mektominai (Tejes 120’+3), Pogba (Xhejms 115’), Grinvud (Fred 100’), Bruno Fernandes, Rashford. Kavani. Tr. Ole Gunar Solskjer.
Sfidanti.al
