Të paktën mund të thonë se nuk mund ta shmangnin. Premier Liga angleze ende nuk e ka në përdorim teknologjinë VAR, diçka që mund ta kishte shmangur atë që ndodhi në ndeshjen e Mançester Sitit. Kampionët barazuan 1-1, por u goditën nga një gabim i arbitrit, pasi goli i avantazhit i Uolvesit u shënua me dorë.

Kjo u kuptua vetëm nga pamjet e përsëritura, ndaj nuk mund të akuzohet gjyqtari, që Uilli Boli e dërgoi topin në rrjetë në mënyrë të parregullt, në minutën e 57-të. Ishin vetë klubet e Premier Ligës që refuzuan përdorimin e teknologjisë edhe për këtë sezon, duke zgjatur me 1 vit periudhën e provës. Tashmë, gjithkush mund ta ketë të qartë se VAR-i duhej, edhe pse jo gjithnjë është përdorur drejt, siç e kanë treguar liga që tashmë e kanë.

Kampionëve në fuqi të Anglisë nuk iu deshën më shumë se 10 minuta për të barazuar rezultatin, veçse seria e fitoreve u ndërpre. Ndeshja ishte e fortë, siç janë thuajse të gjitha në Premier, dhe të dyja skuadrat patën raste për suksesin. Pep Guardiola ndoshta nuk është shqetësuar shumë, pasi një barazim jashtë fushe është normal në Angli, veçse ekipi i tij duhet të gabojë sa më pak, pasi konkurrenca këtë vit pritet shumë e fortë, sidomos nga Liverpuli e Çelsi.

Sfidanti.al