O sa mirë të jesh  shqiptar! Ky slogan që mban gjallë në mënyrë artificiale krenarinë tonë  të rënuar  në futboll, s’ vleka  vetëm për tifozët dhe për futbollistët, por  edhe për shefat, ata që diktojnë në skenë. Një vit më parë, kur Partizani u shpall kampion,  sado lavde që u grumbulluan  tek  trajneri Skënder Gega, as nuk mund të krahasohen me meritat dhe dhelkat  që fitoi  drejtori Olsi Rama. Madje, po të kthesh kokën pas, mu në ditët e triumfit të kuq,  mbetet i paharruar fakti se me trofeun e kampionatit më shumë pozonte drejtori Olsi , duke lënë të kuptohet se në garat tona,  sfida e vërtetë ndizet  midis  shefave, kurse trajnerët janë alibia..

Tani, le të kthehemi në ditët e sotme, në kampionatin ku Partizani po “nxiton” ta dorëzojë titullin , ku të kuqtë kanë  marrë rokapujën  pa  pikën e qederit, duke kalcifikuar  humbjet në  serialin e 5 ndeshjeve me radhë. Dhe, tamam sikur të kemi bërë një pakt kolektiv,  të gjithë qëllojnë dhe blasfemojnë vetëm trajnerin Sormani.  Edhe një i vetëm nuk del për të bërë pyetjen: po drejtori Olsi Rama, kampioni i kampionëve, pse nuk përmendet  fare këtë sezon ? Pse nuk e besojmë  trajnerin Sormani kur del e  thotë publikisht : “ Këtë ekip dhe këta lojtarë kam gjetur ndaj nuk kam çfarë të bëj”.  Pale sikur të kishim pak kujtesë, sa për lezet, që të bekonim  një të vërtetë  : e paska ditur  të keqen që po vinte  presidenti Gaz Demi, kur në ditët e Pandemisë, ishte i vetmi president që tha troç se kampionati duhet ndalur. …

Sfidanti.al