Erdhi koha për të thënë mjaft. Uejn Runi, një nga legjendat më të mëdha të futbollit anglez, vendosi të tërhiqej nga kombëtarja. Sulmuesi 31-vjeçar, pasi u largua nga Mançester Junajtidi për tek Evertoni, bëri edhe hapin tjetër të rëndësishëm. Vlerësimi i gjithë vendit ku u shpik futbolli ishte për të, rekordmenin e ndeshjeve dhe rekordmenin e golave me përfaqësuesen, që u përshëndet me shokët e skuadrës.

“Ëndrrat mund të realizohen, shkruajti ai në Tuiter, dhe qenia pjesë e Anglisë ishte saktësisht kështu. Falenderoj këdo që ishte me mua, qe një kënaqësi e madhe”. Federata Angleze iu përgjigj po në Tuiter. “Pesëdhjetë e tre gola, 119 ndeshje, përgjithmonë një legjendë e jona. Faleminderit Uejn Runi!”.

Runi debutoi për Anglinë në 12 shkurt 2003 kundër Australisë, duke u bërë lojtari më i ri që vishte fanelën angleze në të gjitha kohët. Kjo, në moshën 17 vjeç e 111 ditë. Ai u bë golshënuesi më i mirë i Anglisë në histori, kur realizoi ndaj Maqedonisë në 6 shtator të po atij viti, kur ishte 17 vjeç e 317 ditë. Në një karrierë të shkëlqyer personale, Uejn Runi, vendosi çdo rekord të mundshëm, ndonëse paraqitjet jo bindëse të Anglisë, nuk e lejuan që të fitonte ndonjë trofe të madh, si Kupë Bote apo Kampionat Europian.

Sulmuesi u bë shënuesi më i mirë i të gjitha kohëve kur realizoi një penallti ndaj Zvicrës në 8 shtator 2015. Me 50 gola, ai la një gol prapa legjendën Sër Bobi Çarlton. Ai tërhiqet nga kombëtarja në moshën 31-vjeçare, jo edhe aq e madhe, por duke e ndjerë se e kishte të pamundur të përballonte fizikisht dhe mendërisht një ngarkesë të dyfishtë, edhe në Premier Ligë, edhe me Anglinë. E mbyll me rekordet 53 gola në 119 ndeshje.

Sfidanti.al