Duket se fjalët e trajnerit Mirel Josa nuk i kanë pëlqyer “perëndive të futbollit”, atë ditë kur shkeli tokën bardheblu, dhe fjalët e tij tingëlluan të besës për tifozët e Tiranës, dhe krejt ndryshe në një qytet tjetër, madje si blasfemi..në Korçë. Fjalët që u prezantua tek Tirana nuk do të harrohen kurrë në të dy qytetet: “ Kam fituar tituj me Skënderbeun, kemi bërë histori bashkë, por kënaqësia më e madhe është tani që po kthehem në shtëpinë time..bardheblu”.  Një deklaratë e pazakontë për një trajner që kishte fituar tre tituj dhe që kishte besuar se kishte marrë me vete “paketën magjike” të triumfit, e cila shumë shpejt do të largonte hallet e shumta nga Tirana dhe do të rikthente lumturinë e munguar prej vitesh.  Ajo që ndodhi, me siguri, do ta ketë bindur trajnerin se sëmundja e Tiranës  nuk shërohet me ilaçe tradicionale,as me magji,  edhe kur trajneri është djalë i vërtetë i familjes. Madje mund të thuhet me bindje se predikimi për një familje, nuk tingëllon më i besueshëm. Sidomos kur të kumbojnë akoma në vesh fjalët plot mllef të Mirelit, sapo plasi polemika me futbollistin Taku: “ Këtu jam vetëm unë zoti dhe askush tjetër nuk del mbi mua..”

Sikur Tirana të dëgjonte vetëm zërin e Josës,  askush nuk dyshon se  punët  mund të ishin krejt ndryshe..  Vitet e fundit, edhe për meritë të presidentit Halili, ka shumë zëra që dëgjohen në klubin bardheblu,  madje një trafik i trazuar , aq sa një ditë tifozët  u shfaqën më të pushtetshëm edhe se vetë futbollistët.  Do të kujtohet gjatë, si një skenë e padenjë në klubin  ku historikisht, futbollistët dhe tifozët  kanë krijuar  amalgamën fituese prej vitesh.  Në kohën e Ben Mingës, tifozët adhuronin “yjet” e tyre,  ndërsa në kohën e presidentit Halili, askush nuk e kishte besuar se do të ishin futbollistët që do të “adhuronin” me frikë  tifozët e tyre. E vërtetë e hidhur në një vend, ku topi nuk mbetet vetëm midis futbollistëve, por  në lojë futet edhe “lojtari i 12-të”. Ai që është shumë i fuqishëm  kur ndodhet në altarin e vet, tek shkallët, dhe tepër me rrezik kur merr një ftesë për ..lojë. Një ftesë e gabuar , që pati si finale edhe prishjen midis palëve,  kur tani të divorcuar nuk bën më përshtypje as vargu i humbjeve.  Madje, tek  kjo e fundit  në shtëpi me Vllazninë,  nuk gjeje turp pas ndeshjes, por , çuditërisht, një shpresë e pandershme  se “ do të fitonin Kupën për të shlyer gjithë fajet e sezonit”.  Në ditët e lavdisë bardheblu, Tirana fitonte dhe për hir të tifozëve, në ditët që i ka humbur tifozët, por ka fituar “dashuri me interes” nga krerët e zyrave,  shpreson se kupa do të zbrazet me..Kupën.

Sfidanti.al