Larg qoftë hamendësimi që do të guxojmë të  bëjmë..  Sikur një ditë presidenti Armand Duka të largohet nga froni  i “mbretërimit  absolut”  të futbollit, enigma  më hallemadhe do te ishte:   cili mund të ishte pasuesi i tij në fron. Pyetjet do të kishin lloj-lloj formash  :  si mund ta kishte emrin, nga cili  vend do të zbriste, do ta gjenim  brenda kufirit apo nga jashtë,   biond apo esmer,  sa i gjatë do të ishte,  a do të ishte dot më i bukur se “mbreti”  që kemi,  po numrin e këmbës sa do ta kishte?! Për fatin tonë të keq, edhe përgjigjet e këtyre pyetjeve i ditka vetëm “mbreti”, zoti  Duka, ai që po përgatitet ta kalojë fronin e futbollit në një  trashigimtar të besueshëm për vete dhe të pabesueshëm  për shumicën ..siç e meritojmë!

Këto ditë u mbajt Asambleja Statutore e FSHF-së lidhur me zgjedhjen e presidentit.  Nuk ka hall më të madh në botë, kuptohet për botën shiqtare të topit, sesa ai që lidhet me përjetësinë e presidentit  Duka në fron ,ngaqë jemi të  paaftë  ta tradhëtojmë  despotin pas 20 vitesh.  Asamblistët, ata  që  e kanë fituar me punë e vepra   nofkën “dora në allçi” kanë votuar së bashku kriteret në zjedhjen e presidentit  të ardhshëm.  Kjo që do të dëgjoni, është një “mrekulli” tjetër pas asaj që kurdisëm me bojkotin 8 javësh: “  Të jetë shtetas shqiptar dhe me banim të përhershëm në Shqipëri. Presidenti nuk duhet të jetë apo të ketë qënë deputet, apo drejtues i ndonjë Partie Politike në ..5 vitet e fundit”.

O zot sa e bukur! E ktheu futbollin në një parti me top të shpuar, ku futbollistët e Kombëtares janë kapur gjallë ndër vite disa herë duke bërë fushata politike, kurse  vetë në ditët e bojkotit  as nuk ia ndjeu fare kur  tha  publikisht se “nëse zoti Rama aprovon 4 kërkesat tonë ekonomike, i gjithë futbolli, i madh dhe i vogël, do të votojë për PS-në”.

S’qënka e mjaftueshme  që kemi 20 vite që durojmë një lojë tollovitëse  futbolli, ku skenën e  teatrit e ka  zaptuar vetëm njëri, pra vetë zoti Duka, i cili  i moleps të gjitha çka loja e fushës …penalltitë, goditjet e dënimit , kornet , madje edhe topat kur dalin jashtë fushe….nuk ka kush t’i kap tjetër. Kjo që ndodhi në Asamblenë e fundit, detyrimisht të shpon  një pyetje: nëse presidentin  e futbollit nuk u bëkan  dot as Igli Tare as  Besnik Hasi, politikanet jo e jo,  të paktën na trego cilin ke bërë brenda “vezës së artë”, që do të  luajë rolin e “mbretit”,  të atij mbreti që do të kurdiset drejt së ardhmes, ngaqë ju nuk jetoni dot pa “qumështin bio” të lopës së futbollit…

Sfidanti.al