Kanë mbetur më shumë se të habitur, madje me gisht në gojë, gjithë ata që kishin besuar se ndërhyrja e fortë e mbrojtësit  Shameti të Kukësit ndaj Bakajt të Vllaznisë do të ndëshkohej nga arbitri. Por, arbitri me stemë, Andi Koçi,  tamam sikur të kishte mbyllur sytë në atë moment, e ka shpërfillur episodin në një mënyrë flagrante.  Përse  nuk e nxorri kartonin nga xhepi kur kavilja e Elisit shpëtoi për qime?  Sikur të kishte gabur vetëm arbitri do të ishte një ngushëllim, por gafa bëhet më spektakolare kur kalon nga fusha në maviolë.  Ish-gjyqtari  i FIFA-s,  Bujar Pregja,  me maviolën e tij, e cila edhe nuk shkrep mrekullisht në disa raste, ka bërë një gjykim për  “rastin Shameti”, i cili  nëse do të kopjohej nga të tjerët, rrezikon të bëhet një epidemi. E dinim se maviolistët urdhërohen për deformim te “sheqerosur” në disa raste, por nuk të shkonte mëndja se do të mbronim në ekran edhe lojën e fortë,tejet  të rrezikshme. Interpretimi i Pregjës la për të dëshiruar: “ Shameti ka prekur topin në fillim, pastaj ka bërë ndërhyrjen e gabuar..”.  Sipas tij, kartoni i munguar i Andit , nuk paska qënë një  arratisje nga rregullorja..

Një njeri tjetër me stemë, arbitri Jemini  është pyetur për rastin në fjalë: “  Nuk mund të shpëtonte pa karton Shameti në atë rast. Ajo ndërhyrje ishte diçka më shumë se kartoni i verdhë dhe diçka më pak se kartoni i kuq.  Ne themi se ishte “kartoni rozë” midis të dyve.  As Zoti  nuk e shpëtonte dot Shametin pa kartonin e verdhë, të pakten, sidomos  pas atij gjesti që për fat  nuk pati pasoja më të mëdha”.  Nuk e fal Zoti për Jeminin, por e fali Koçi në fushë dhe më pas edhe “bamirsja e njohur “ maviola e Pregjës, që shikon prekjen e lehtë  të topit,  dhe duket e verbër kur takat ngjeshen frikshëm , mu para  syve tanë që ndihen të keqpërdorur…

Sfidanti.al