Teuta apo Partizani do të shpallet kampion? Na duket  si dilemë, por mund të jetë edhe trilemë  nëse nuk shpërfillen edhe kartat e Laçit në vallen për titull. Sido që ta ketë emrin ekipi kampion,  “çunat e sistemit” e kanë trilluar mjaft “besueshem”   skenarin e deritanishëm, pasi është një sezon  unikal, ku vetëm orakujt  e zyrave e dinë fundin e filmit.  Një film që ka mbërritur në 4 javët e fundit, ku  një zot e di se çfarë mund të ngjasë, pasi  mëson se ndeshjet do të  luhen me një “sistem klandestin”  të fshehura në ditët e javës,  duke injoruar ditët më të bekuara të futbollit, të shtunat dhe të dielat.

Dhe në një kampionat që u trazua thellë  kalendari,madje u bë  lesheli, për shkak të bojkotit 8 javor, pse të luajmë kukafshehti në 360 minutat e fundit?  Duket se është një mendje diabolike që kujdeset për “vaksinimin”  e popullates së mbijetuar të futbollit,  së cilës nuk i mjafton boshatisja e stadiumeve nga tifozët për shkak të pandemisë, por  kurdis marifetin që javët e fundit të humbin nga sytë, të kenë sa më pak dëshmitarë!

Sfidanti.al