Në Kolumbi intensifikohet gjuetia për rrëmbyesit e Luis Manuel Diaz. Pas 24 orësh kërkimesh të pafrytshme, qeveria e Bogotës ka vendosur të vendosë ushtrinë dhe forcat speciale për të gjetur babain e sulmuesit të Liverpool, Luis Fernando, të rrëmbyer gjatë fundjavës në departamentin e La Guajira, në veri të vendit. Helikopterët e zbulimit dhe avionët e pajisur me sensorë nxehtësie janë në terren.

Siç raportojnë mediat lokale, vëmendja është përqendruar mbi të gjitha në zonën juglindore të departamentit, ku ndodhet kufiri me Venezuelën. Frika e autoriteteve është se Diaz mund të transferohet përtej kufirit, duke i bërë edhe më të vështira kërkimet. Ndërkohë, një shpërblim prej 200 milionë pesos, rreth 50 mijë euro, është caktuar për këdo që jep informacion të dobishëm për gjetjen e tij.

Luis Manuel Diaz u rrëmbye të shtunën pasdite nga dy persona të armatosur pranë një karburanti dhe makina e tij u gjet disa orë më vonë në një zonë të pyllëzuar. Me të ishte edhe gruaja e tij, por ajo u lirua pothuajse menjëherë. Dy ditë pas rrëmbimit, rrëmbyesit ende nuk kanë dërguar asnjë sinjal.

“Ne kemi një ‘Black Haëk’ në ajër për të kërkuar rrugën e mundshme të arratisjes dhe kemi njerëzit më të mirë në vend të angazhuar në kërkim”, siguroi koloneli i ushtrisë, Giovanni Montanez Acosta. Guvernatori i La Guajira, Diala Wilches, në vend të kësaj premtoi se ” Diaz do të gjendet dhe do të lirohet falë përdorimit të të gjitha forcave në dispozicion”.

sfidanti.al