Pavarësisht dëmtimit, nuk ka qenë një sezon “i thatë” deri tani për Lionel Mesin, përkundrazi. Me 17 gola në La Liga dhe 6 në Champions, ylli i Barcelonës ishte në rregull me “planin e tij vjetor”, veçse i kishte mbetur edhe një kompeticion pa realizuar, Kupa e Mbretit. Jo se nuk kishte dashur, por nuk kishte pasur mundësi. Mbrëmjen e së enjtes, ai shënoi edhe në kupë, në portën e Levantes.

Barcelona fitoi 3-0, duke përmbysur humbjen 1-2 të ndeshjes së parë, e duke u kualifikuar për në çerekfinale. Trajneri Valverde kishte vendosur të mos e lodhte kapitenin në kupë, por humbja e detyroi që të mos rrezikonte. Dy golat e parë u shënuan nga Usman Dembele, që po e gjen veten gjithnjë e më shumë në radhët e katalanasve.

Mesi ka shënuar deri tani 23 gola në 24 ndeshje këtë edicion, në standardet e tij më të mira, dhe besohet se do ta kalojë shifrën e 40 golave për herë të 10-të radhazi në karrierë.

Sfidanti.al