Arriti një fitore ndaj një rivali të vërtetë, ndaj kampiones në fuqi të Spanjës dhe ndaj njërës prej skuadrave më të mira të La Ligës. Barcelona mundi 4-2 Atletikon e Madridit në “Kamp Nou” duke treguar më në fund fytyrën që pritej prej saj, fizionominë e një ekipi që mundet dhe duhet të luftojë për tituj. Zhordi Alba, Gavi, Ronald Arauho dhe Dani Alvesh ishin shënuesit për të besuarit e trajnerit Ksavi Hernandez, ndërsa Atletiko vuajti edhe mungesat e disa lojtarëve si Grizman apo të tjerë. Karrasko kaloi Atletikon në epërsi, dhe Suarez shënoi ndaj ish-ekipit të tij për 2-4, pasi Dani Alvesh mori karton të kuq.

Ksavi pati mundësi të hidhte në fushë disa nga lojtarët që janë pjesë e planeve të tij si Arauho, De Jong, Buskets, Pedri, Gavi, Ferran Torres dhe Adama Traore, të cilin trajneri e mburri shumë. Me këtë fitore, Barça kaloi Atletikon në renditje, duke qenë e katërta me 38 pikë (36 madrilenët), e vetëm 2 pikë larg Betisit që u mund. Nuk është e lehtë të mbërrihet Sevilja, dhe aq më pak Reali kryesues, por “blaugranët” sot po luftojnë për Championsin. Sezonin që vjen mund të flitet për titull.

Barcelona (4-3-3); Ter Shtegen, Dani Alvesh, Arauho, Pike, Zhordi Alba, De Jong, Buskets, Pedri (Niko 66’), Gavi (Dest 71’), Ferran Torres, Adama Traore (Obamejang 61’).

Sfidanti.al