Presidenti i Tiranës, Refik Halili ka ngritur zërin për ato qo i cilësoi si “padrejtësi të arbitrave ndaj skuadrës bardheblu”. Halili ka të gjithë të drejtën e botës të “ankohet” ashtu siç bëjnë edhe një pjesë e madhe e presidentëve jashtë kuintave duke ushtruar presion të drejtëpëdrejtë ndaj xhaketave të zeza, por ajo që nuk shkon në këtë tablo është momenti se kur ai ka vendosur ta bëjë këtë denoncim e aq më shumë edhe mënyra se si ai e ka bërë.

Në fund të derbit ku Tirana u trajtua minimalisht si e barabartë, është e gabuar të shfrysh ndaj “bilbilave” por ndoshta kjo është një strategji. Në të tilla raste kur asgjë nuk shkon, ndoshta është më mirë që të fajësohet dikush tjetër për të hequr vëmendjen nga problemi i vërtetë dhe deklarata e Halili duket se është bërë pikërisht për këtë qëllim.

Tirana ka shumë probleme më të mëdha se sa arbitrat dhe një prej tyre janë financat e klubit. Me probleme të theksuara në bankë, bardheblutë janë në një kaos të vërtetë organizimi duke zhbërë ato dy tituj të fituar me sakrificë e klas gjatë viteve të fundit. Halili premtoi se këtej e tutje klubi do të merret edhe me xhaketat e zeza por faji që lojtarët largohen dhe skuadra i luan ndeshjet e shtëpisë sa nga Elbasani në Lushnje e Durrës, me siguri nuk është i arbitrave…këtë herë.

Nga Pirro Bardhyli