Me gjuhën e basteve, për të cilën po luajmë pjesën sikur është një gjuhë e vdekur në lojën tonë, kjo java e parë e 2020-tës në Superligë, mund të pagëzohet si një 2-sh i madh dhe i pabesë. Një blof.. nga ata që të lënë jo vetëm me gojë hapur, por edhe me këmbë hapur.  Ndërsa pritej të ndizej gara e rivalëve  Kukësi, Partizani ,Bylis  apo Tirana, ka shpërthyer ekipi i arbitrave , gati si me një skemë kolektive të pjekur mirë nga ..trajneri!  Paskan qënë të vërteta fjalët e falxhores se, ky vit do të jetë më i pasur me gabime njerëzore,  prej të cilave nuk do të qahemi dot,  se janë gabime që shkaktohen në emër të ‘kauzës” për..bamirësi!  Të gjithë u qanë këtë javë, edhe fituesit, edhe humbësit.  Midis fituesve spikati Skënderbeu , i cili pasi gjunjëzoi Partizanin me 3 gola, i dha një shuplakë edhe arbitrit që, sipas tyre, kishte “veshur” uniformën e kuqe gjatë ndeshjes.  Një metaforë e bukur në kohën e sotme,  e cila  pickon edhe të kaluarën , në ditët e arta të Skënderbeut, kur  thuhej me humor se ca arbitra, edhe me stemë, s’ i zinte dot  gjumi,  po të  mos vishin pizhamet bardhekuq si uniforma  e ekipit..

Po nga humbësit, cilët ekipe i kishin lotët më të besueshëm? Nëse do të guxonim të bënin një klasifikim për viktimat e vitrinës së kësaj jave funebre , Luftëtari  nuk ka të krahasuar  me askënd. Pazotësia e arbitrit debutues  u ngjit  lart , madje edhe më lart se Kalaja e qytetit,   sidomos në momentin e anullimit të golit. Një gol që i shtohet dyzinës së golave që futen në muzeun e pafajësisë. Një gol , të cilit po t’i japësh shpirt, do të pyesnim: lindi i vdekur apo e vdiq “doktori me të zeza” se aq dinte apo se kështu i kishin thënë eprorët? Dhe më e bukura, diku, golin e mbysin në kohën më të  gjallë, si në Gjirokastër, diku tjetër, në Selman Stërmasi, në ndeshjen Tirana-BYlisi, goli  sajohet  nga koha e vdekur, shtesë përmbi shtesë. Dhe në një lojë të trazuar me mjeshtri nga “ çunat e sistemit” ,  mjerë ai që beson se gabimet njerëzore po shtohen , ngaqë  një brez i ri arbitrash  po ushtrohet në zanat, po mëson si ta ngasë me marifet ..bilbilin. Pale kur dëgjon Sokol Jarecin, disenjatorin e tyre,  i cili fliste si pa të keq,  madje na këshillon që të mbajmë  qetësi e të mos bëjmë  shumë zhurmë,  kur i bënte VAR-in në “ekranin e gazetës” , gabimeve trashanike dhe spektakolare të një jave të paskrupullt…

G.Sinemati

Botuar ne Panorama Sport