Ka disa ndeshje futbolli, për të cilat thuhet se ngjasojnë me ndeshjet e keçit, ku  skuadrat në fushë, tamam si mundësit e keçit në ring, një herë “fiton”  njëra dhe tjetra kalon në pasivitet, e pastaj.. ndërrohen rolet përsëri. Ajo që ndodhi në ndeshjen Tirana me Kukësin  nuk kishte një ligjësi të tillë, pasi Tirana dominoi në minutat e prologut, shënoi dhe golin e endërruar , pa e ditur se pas festës për avantazhin rolet do të ndryshonin kryekëput. Tirana u shfaq me një fytyrë të zbehtë,  disi e trembur në lojë, duke u strukur në portën e saj dhe Kukësi,  pati privilegjin e madh, për meritë dyfishe , të vetën dhe të  kundërshtarit, të frymëzonte një nga ndeshjet më argëtuese.  Kanë ndodhur shumë përmbysje në Superligë, nga ato që mbajnë erë dhe nga ato që nuk mbajnë erë, por kjo  e Kukësit në kurriz të Tiranës, do të kujtohet  si  një  përmbysje , ku 3  golat dhe loja pushtuese ,  krijuan një amalgamë që s’ ishte shijuar prej kohësh…

Ka shumë pyetje pas kësaj ndeshjeje ,   e cila e thelloi ndjeshëm  zhgënjimin e tifozëve të Tiranës, kurse  në anën tjetër, ka ndezur oreksin  e tifozëve të Kukësit se ekipi i tyre, kur i shkrepet në kokë, luan më shëndetshëm se rivalët për titull. Thonë, dhe besohet më shumë këtë herë, se 3 golat e kuksianëve ishin të denjë për muze  nga mënyra e ekzekutimit. Penalltia e Shkurtaj,  mund të shijohet  si një gjest teknik, por dhe  rebelues, ku guximi e kapërcen arsyen, ndërsa shikon topin që shkon në portë sipas trajektores së famshme “alla Panjenka”.Po goli i Gavazajt,? Një prelud me të majtën, si për të mbyllur gojët e atyre që predikonin  se talenti i tij ka  filluar të vyshkej.  Kurse goditja kristalore nga encja e Abazajt.. vulosi cilësinë e spektaklit të tyre në ndeshjen me Tiranën. Ishte një fitore  pikante  për Kukësin dhe  humbje e hidhur  për bardheblutë, nga e cila edhe mund të “fitosh”. Ishalla e kanë kuptuar leksionin e radhës, që ishte si shuplakë për thirrjet e saj, gati të pamoralshme,  se do të shpallet kampione, jo se ka 100 probleme, por se ka 100- vjetorin e jubileut  të klubit!

G.Sinemati

Botuar ne Panorama Sport