Ndeshja pati rëndësi për rezultatin, por edhe për yllin kryesor të skuadrës. Portugalia dhe Kristiano Ronaldo ishin me mision në duelin e fundit të eleminatoreve të Europianit në fushën e Luksemburgut, sfidë që e mbyllën me sukses, veçse pjesërisht. Ronaldo synonte të arrinte në kuotën e 100 golave me ekipin përfaqësues, dhe për këtë i duhej të realizonte dy herë, diçka që nuk arriti ta bënte.

Gjithsesi, superylli i Juventusit nuk mund të dilte nga fusha pa e tundur rrjetën, dhe këtë e bëri katër minuta para fundit. Kjo ishte rrjeta e 99-të e tij me fanelën “luzitane”, dhe shumë shpejt ai do të mbërrijë e kalojë njëqindën, për të synuar më pas rekordin botëror që mbahet nga ish-sulmuesi i Iranit, Ali Daei.

Portugalia fitoi 2-0, me golin e parë të realizuar nga Manuel Fernandez. Ky sukses bëri që skuadra e trajnerit Fernando Santos të kualifikohej për në finalet e Euro 2020-ës, pasi u ngjit në kuotën e 17 pikëve, duke mbajtur vendin e dytë në grup. Në vend të parë doli Ukraina me 20 pikë, pasi barazoi në sekondat e fundit ndaj Serbisë në Beograd, me shifrat 2-2.

Sfidanti.al