Nëse duhej edhe një goditje fatale, ja ku erdhi. Paris SG pësoi edhe një disfatë në nivel kombëtar, pas dështimit në Champions, këtë herë duke humbur Kupën e Francës. Skuadra e krijuar me pretendime të mëdha, për t’u matur me gjigandët e kontinentit, u mposht nga Rena modeste, në finalen e luajtur pikërisht në qytetin e saj, në “Stadë të Frans” të Parisit.

Sfida përfundoi vetëm pas 120 minutave dhe gjuajtjeve të penalltive, ku një gabim nga Nkunku i dha kupën Renës. Kjo humbje iu shtua eleminimit nga Kupa e Ligës, dhe disa rezultateve negative radhazi në Ligën e Parë, edhe pse PSG e fitoi titullin.

E pra, ndeshja nisi shumë mirë për parizienët që arritën avantazhin e dy golave. Dani Alvesh dhe Nejmar, i rikthyer nga dëmtimi, ishin autorët e golave që në 21’ e para, gjithçka do të përmbysej shpejt. Kimpembe shkaktoi autogol 5 minuta para pushimit, ndërsa Mekser barazoi rezultatin në minutën e 66-të. Nuk bëri punë epërsia dërrmuese në talent dhe potencial e skuadrës së trajnerit Tomas Tuhel, që në momentet vendimtare u braktis edhe nga fati.

“Është shumë e vështirë të shpjegoj këtë që ndodhi, – u shpreh gjermani më pas, – e nisëm shumë mirë, shënuam golat, patëm shumë raste, treguam nivel dhe cilësi, por në fund humbëm. Duhet të mendohem për disa ditë, por është e qartë se dua të vazhdoj këtu”.

Finalja ishte si një serial filmash, me nervat, emocione, konflikte dhe antipati. Kilian Mbape nuk u përmbajt dot dhe u përjashtua me karton të kuq në minutën e parafundit shtesë, për një ndërhyrje të rrezikshme. Kartoni i kuq dhe dënimi mund t’i humbasin Këpucën e Artë të Europës, për të cilën është në garë me Mesin.

Ylli tjetër parizien, Nejmar, po ashtu nuk e përballoi dot presionin dhe dëshpërimin e humbjes, duke goditur një tifoz, me shumë gjasë rival, që e qortoi se në fillim duhej të mësonte të luante futboll. Pritet të ketë dënim edhe për brazilianin. Së fundi, presidenti i PSG-së, Al Helaifi, bëri figurë tepër të keqe, kur refuzoi fillimisht t’i shtrëngonte dorën lojtarit të Renës, Hatem Ben Arfa, ish-futbollist i parizienëve. Më pas, pranoi, por imazhi i keq mbeti.

Një tjetër sezon i dështuar për klubin e zotëruar nga sheikët. Mbi 1.2 miliardë USD të shpenzuara që nga viti 2011 nuk kanë dhënë rezultat dhe nuk dihet se kur Paris SG do të jetë në nivelin e Realit, Barcelonës apo Bajernit.

Sfidanti.al