Carlo Ancelotti ka nisur një epokë të re në drejtimin e përfaqësueses së Brazilit, jo vetëm si një nga trajnerët më të suksesshëm në histori, por edhe si figurë me ndikim të jashtëzakonshëm shoqëror dhe mediatik. Me 31 trofe në karrierë, italiani nuk është më thjesht një emër i njohur në botën e futbollit, por një markë globale që po rikthen besimin e një kombi të tërë. Pas prezantimit zyrtar më 26 maj, Ancelotti fitoi afro 200,000 ndjekës të rinj brenda ditës, duke e çuar totalin e tij në Instagram në 17.7 milionë, më shumë se çdo trajner tjetër në botë. Njëkohësisht, llogaria zyrtare e CBF rikuperoi ndjeshëm ndjekësit e humbur pas skandaleve të fundit, duke arritur në 18 milionë. Mesazhi i parë i italianit për brazilianët, “Olá Brasil”, u pa gati 9 milionë herë.

Ndikimi i tij shkon përtej rrjeteve sociale. Ekspertët e marketingut sportiv e cilësojnë si “aset strategjik” që i jep CBF-së një tjetër nivel në perceptimin publik. Stili i tij i përulur, i ekuilibruar dhe miqësor e bën Ancelotti-n ideal për të rikthyer harmoninë mes skuadrës dhe tifozëve. Ai nuk kërkon protagonizëm, por e projekton forcën përmes autoritetit të qetë dhe rezultateve. Përzgjedhja e Ancelotti-t sinjalizon edhe një ndryshim historik në trajtimin e futbollit brazilian: një pranim i qartë se për të qenë konkurrues në arenën botërore, nevojiten figura me përvojë të madhe ndërkombëtare. Ndikimi i tij tashmë ka filluar të reflektohet edhe në tregun e basteve sportive, ku Brazili është kthyer favorit për Kupën e Botës 2026, përkrah Francës dhe Anglisë.

Carlo Ancelotti nuk është thjesht një trajner i ri për Brazilin. Ai është lideri që mund ta bashkojë kombëtaren më të titulluar të historisë me shpresat e miliona tifozëve, në një mision që tejkalon futbollin: të rikthejë krenarinë e një kombi.

sfidanti.al