Tirana është mundur nga Teuta në javën e 35-të të Kategorisë Superiore dhe ky rezultat ka pasur një pasojë shumë të rëndë për skuadrën e Bledi Shkëmbit. Ajo jo vetëm ka shkuar në zonën e rrezikshme të klasifikimit, atë të rënies direkte, por edhe i ka dhënë fund shanseve të saj për të siguruar mbijetesën direkt në elitë. Tashmë Tirana është në kuotën e 36 pikëve pas 35 javësh dhe për të mbajtur gjallë shpresën e qëndrimit në Superiore dhe i duhet me çdo kusht fitorja në derbin e javës së fundit ndaj Dinamos. Vetëm një llogari bën punë për bardheblutë, ajo e fitores në këtë sfidë. Në çdo rezultat tjetër të tyre, kthimi në Kategorinë e Parë do të ishte i pashmangshëm. Nëse fiton, Tirana shkon direkt në vendin e 8 në Superiore, sido që të jenë rezultatet e sfidave Vllaznia-Laçi dhe Skënderbeu-Bylis, pasi në çdo kombinim rezultati të mundshëm në Korçë, bardheblutë lënë dy skuadra mbrapa në renditje. Ata kanë bilanc më të mirë në ndeshjet direkte ndaj Bylisit, Skënderbeut e Laçit. Fakti që korçarët dhe ballshiotët mbyllin kampionatin me një ndeshje mes tyre me pikët që kanë aktualisht në renditje, bën që Tirana të mos ketë asnjë mundësi për vendin e 7 që do e shpëtonte plotësisht nga rënia, pa shkuar në ndeshjen shtesë.

sfidanti.al