Katër humbje radhazi janë shumë për ekipin kampion, ndërsa janë shqetësim kur përsëriten për të dytën herë që nga shkurti. Los Anxhelos Lejkërsat janë në rënie të lirë në sezonin e rregullt të NBA-së që pas dëmtimit edhe të Lebron Xhejmsit, pas atij të Entoni Dejvisit. Humbja e katërt radhazi edhe në shtëpi nga Filadelfia, që jo më kot është skuadra më e mirë e Konferencës Lindore dhe e dyta më e mirë deri tani në kampionat. Miqtë patën frymëzimin kryesor nga Deni Grin, ish-lojtar i Lejkërsave, që shënoi 28 pikë. Ai realizoi 8 gjuajtje tripikëshe dhe u shpreh më pas se “erdha të takoj disa nga vëllezërit e mi, dhe të ndeshem me ta, e bukur që fituam”. Grin mori unazën e titullit kampion të fituar vjet me Lejkërsat, siç bëri edhe Duajt Hauard, që gjithashtu kaloi nga Liqënasit tek Filadelfia. Për habi, Grin nuk e ka marrë ende unazën e titullit kampion që fitoi në 2019 me Toronton, për shkak të pandemisë. Filadelfia fitoi 109-101 në “Stejpëll Sentër” dhe ka 32 fitore e 13 humbje në krye të Konferencës Lindore, ndërsa Lejkërsat kanë 28 fitore e 17 humbje në vendin e katërt në Perëndim, por të rrezikuar nga Denveri, Portlendi dhe Dallasi.

Sfidanti.al