Ronaldo tremb me largimin nga futbolli, dhe krahasohet sërish me Mesin

Kjo verë po tregon se mbetet në formë si gjithnjë. Sidoqoftë, Kristiano Ronaldo është mësuar të habisë, dhe nuk ngurron ta bëjë në një intervistë për mediat portugeze. Superylli i Juventusit deklaroi se mund të tërhiqet që vitin e ardhshëm, ndërsa foli për televizionin TV1.

“Unë nuk mendoj për mbylljen e karrierës, – ishin fjalët e CR7-ës, – ndoshta unë mund të largohem që vitin e ardhshëm, por gjithashtu unë mund të luaj deri në moshën 40 apo 41-vjeçare. Nuk mund të them gjë më shumë, thjesht dua të jetoj momentin. Kënaqësia është e madhe dhe dua të vazhdoj ta shijoj”.

Ronaldo ka një karrierë të gjatë, prej gati 18 vjetësh, duke fituar trofe të rëndësishëm me Mançester Junajtidin, Realin e Madridit dhe Juventusin. Ai konsiderohet si një nga lojtarët më të fortë fizikisht në botë, dhe besohet se mbetet i tillë edhe në moshën 34-vjeçare. Së fundi, portugezi rinovoi kontratën me Juven pasi e udhëhoqi drejt titullit kampion në Itali, duke qenë edhe shënuesi më i mirë i skuadrës me 21 gola.

Gjatë gjithë këtyre viteve, ai ka qenë në konkurrencë me superyllin tjetër, Lionel Mesin, duke pasur 5 Topa të Artë, po aq sa edhe argjentinasi i Barcelonës. Shumëkush e quan pikërisht Mesin si më të mirin e Epokës, por Ronaldo ka mendim tjetër.

“Ajo që unë kam arritur nuk mund të krahasohet me asnjë tjetër, – ishin fjalët e tij, – a ka ndonjë futbollist tjetër që ka më shumë rekorde sesa unë? Nuk mendoj se ka lojtarë që kanë aq rekorde sa unë”. Juventusi me Ronaldon është favorit për mbrojtjen e titullit në Serinë A, por synimi kryesor mbetet fitimi i Championsit.

Sfidanti.al