Ish-mesfushori i Manchester United dhe Anglisë, Paul Ince, është akuzuar për drejtim mjeti në gjendje të dehur. 57-vjeçari u arrestua pasi teksa drejtonte makinën e tij Range Rover u përplas në një rezervat qendror në Cheshire, në veriperëndim të Anglisë të shtunën. Ai do të paraqitet në Gjykatën e Magjistraturës në Chester më 18 korrik. Në një deklaratë, Policia e Cheshire tha: “Rreth orës 17:00 të shtunën, më 28 qershor, policia u thirr pas raportimeve për një përplasje në Chester High Road, Neston.” Ish-mesfushori, i cili luajti gjithashtu për Interin në Serie A, Liverpool, West Ham United, Middlesbrough dhe Wolves, fitoi dy tituj të Premier League, dy Kupa FA, një Kupë të Ligës dhe Kupën e Fituesve të Kupave Evropiane me United në vitet 1990. Ai shënoi dy gola në 52 ndeshje me Anglinë dhe ishte kapiteni i parë me ngjyrë i vendit. Më pas u bë trajner duke marrë drejtimin e Blackburn Rovers, Macclesfield Town, Milton Keynes, Blackpool, Notts County dhe Reading.

Sfidanti.al