Mos harroni dorën, se koka nuk ju duhet në Asamblenë e Përgjithshme!  Ky do të ketë qënë slogani i ftesës së FSHF-së për klubet e futbollit, kur shikon se sistemi i “dorës në allçi” është përsosur  edhe në versionin online!  Edhe në kohën e Pandemisë,  kur e gjithë bota e futbollit ka hapur gojën për të marrë tamponin e shumëpritur, këtej në anët tona, “tamponi” që pëdoret në Asamble është çudibërës  nga efekti. Një ilaç, i cili  nuk gjëndet në asnjë habitat tjetër në hartën e  futbollit, ku koka të ulet poshtë dhe dora të ngrihet lart!  Edhe kjo Asmable,  së cilës i kanë vënë një mbiemër të rremë “ e Zakonshme”, nga doza e përqindjeve të votimit duket  e pazakontë, disi anormale..  Aq e pazakontë, sa mund të thuhet se futbollin e votave  e kanë tredhur me rrënjë moralisht, saqë FSHF po ngjason me  një Parti despotike , më shumë sesa me  një organizatë  sportive..

Kjo Asamble do të kujtohet për hapjen spektakolare. Ç’ishte ai   falenderim  thumbues  ndaj Shtetit qysh në minutat e para?Si mund  të harrohet hapja e saj bujëmadhe , tamam si në ato ndeshjet e pabesa, ku më shpejt vjen goli se sa bie  bilbili i arbitrit. Ku do te gjendet   një  Asamble tjetër, ku Qeveria e futbollit , ka  djegur gjithë “skedinat parashikuese”. Dhe ishte vete  presidenti Duka (dhe jo më tellallët),  autori i  një falenderimi  driblues per  zotin Rama: “  Ju falenderoj për mosbashkëpunimin dhe injorimin që bëtë qoftë për ndihmën financiare të personave që punojnë në futbollin shqiptar, por dhe për rinisjen e kampionatit”. Ishin  fjalë që perlotën qysh në fillim anëtarët e “kongresit”, sa dikush kishte kujtuar me nostalgji  takimin e fundit të presidentëve me zotin Rama, kur shefi i politikes dhe ai i topit  ia pasonin topin me sy mbyllur njëri- tjetrit, ndryshonin kaq me marifet  rolet gjatë “lojës”, sa nuk merrej vesh në ca momente se cili  ishte kryeministri, e kush na  ishte presidenti i futbollit,…

Sfidanti.al