Për yllin më të shquar të ligës nuk mund të ketë diskutime. Juventusi është gati të plotësojë çdo kërkesë të Kristiano Ronaldos, edhe në periudhën e vështirë të koronavirusit, gjë që nuk mund të thuhet për të tjerët. E pohon drejtori sportiv i klubit torinez, Fabio Paratiçi, në një video intervistë për televizionin “Skaj Sport”, ku foli për gjendjen e rinovimeve te kampionët e Italisë, dhe për përforcimet e mundshme.

“Ronaldo është një lojtar i veçantë, – theksoi Paratiçi, – i cili ndikon në rritjen e të ardhurave të klubit, ndaj nuk ka asnjë problem për rinovimin. Për lojtarët e tjerë do të jetë më e vështirë”. Portugezi merr rrogë mbi 30 milionë euro nga Juventusi, por edhe të ardhura shtesë në bazë të klauzolave dhe kontratave të sponsorizimit brenda klubit. Futbollistët e tjerë mund të jenë të detyruar të kënaqen me më pak, ndonëse Paratiçi thotë se bisedimet po ecin mirë.

Ai theksoi se janë thuajse të kryer rinovimet e kontratave të veteranëve Xhorxhio Kielini dhe Xhanluixhi Bufon. Po ashtu, bisedime janë bërë për yllin e sulmit, Paulo Dibala, por ato u ndërprenë për shkak të koronavirusit, si dhe nga fakti se argjentinasi u prek nga epidemia dhe ende nuk dihet nëse është shëruar plotësisht.

Përsa i përket përforcimeve, flitet se Juventusi kërkon Pol Pogbanë nga Mançester Junajtidin. Paratiçi thekson se pengesa më e madhe për të marrë kampionin e botës është rrota e tij tepër e lartë, që thuhet se është 15 milionë euro në sezon. Për yllin e Francës janë të interesuar edhe Reali i Madridit, Paris SG si dhe edhe Interi.

Sfidanti.al