Në futboll rëndësi ka të fusësh topin në rrjetë. Jo vetëm kaq, por edhe që momentet e diskutueshme të interpretohen me të drejtë apo jo, në favorin tënd. Franca i pati të dy këta elementë në krahun e vet në finalen e Ligës së Kombeve që fitoi 2-1 ndaj Spanjës në “San Siro” të Milanos. Festë e madhe për “blutë” e trajnerit Deshamp”, por akuza të ashpra të spanjollëve për pozicionin e Kilian Mbapesë. Iberikët thirrën “jashtë loje”, pasi Mbape ishte përtej mbrojtësit të fundit kur Hernandez dha pasimin, por VAR-i interpretoi rregullin e ri duke e quajtur të vullnetshme prekjen e Erik Garsisë.

“Po ndryshojnë futbollin, – jep alarmin “Marka”, – interpretim i pakuptueshëm nga VAR-i për rregullin qesharak të ofsajdit!”

“Padrejtësi, – thotë “Sporti” e Barcelonës, – një kombëtare e madhe e Spanjës humb ndaj Francës në mënyrë skandaloze, gol i parregullt!”

Spanja pati gjithashtu pretendim për penallti në pjesën e parë, kur mbrojtësi Kunde preku topin me dorë në zonë.

Gjyqtari nuk sinjalizoi asgjë, duke mos e quajtur të parregullt. Franca fitoi me përmbysje pasi fillimisht, “furitë e kuqe” kaluan në avantazh me golin e Ojarzabalit në pjesën e dytë. Për fatin e kampionëve të botës, Benzema është kthyer në ekip dhe ishte merita e tij për barazimin pas dy minutave. Në fund vendosi Mbape, dhe jehona në Francë ishte e madhe.

“Një tjetër kupë në shtëpi, – feston “L’Ekip”, – tre vjet pas titullit botëror, Blutë fshijnë dështimin në Europian!”

“Fitorja e bukur e Bluve, – ka në kopertinë “Lë Parizien”, – Ekipi i Deshampit shkëlqen, me madhështorin Benzema e Mbapenë!”

Sfidanti.al