Ishte e qartë se ishin më pranë, dhe përfundimisht ia dolën. Volejbollistët e Tiranës u shpallën kampionë të Shqipërisë në volejboll për meshkuj pas fitores 3-2 në ndeshjen e katërt finale ndaj Partizanit. Një përballje e fortë në Sallën Olimpike “Feti Borova” në kryeqytet, me djemtë bardheblu që treguan karakter për të reaguar pasi u ndodhën dy herë në dizavantazh. Setet ishin 25-18 për Partizanin, 25-22 për Tiranën, 26-24 për Partizanin dhe pastaj 25-21 dhe 15-5 për kampionët. Skuadra e trajnerit Arben Sako u kuptua që ishte më e fortë sidomos duke dominuar në setin final.

Seria finale e plej ofit ndaj të kuqve u mbyll 3-1 me fitore për bardheblutë. Ky ishte titulli i dytë radhazi për tiranasit, që edhe vjet fituan nën drejtimin e Sakos, ndërsa në total ata kanë 11 trofe të kampionateve shqiptare. Festa ishte e madhe dhe plotësisht e ligjshme për kapitenin Ledion Martiro, lojtarin më të vjetër dhe njëkohësisht zv. trajnerin Klodian Ferhati, si dhe për gjithë volejbollistët e tjerë dhe për tifozët në Sallën “Feti Borova”.

Sfidanti.al