Në kampionatin amerikan të basketbollit janë mbyllur tashmë votimet për lojtarët që do të luajnë në të famshmen NBA All Star Game, të cilët do të ndahen në skuadrat e kapitenëve LeBron Xhejms dhe Janis Antetokumpo, ndërkohë që në 31 janar do të mësohen edhe emrat e lojtarëve rezervë të kësaj sfide spektakolare. Në 7 shkurt, kapitenët do të bëjnë përzgjedhjen e tyre në një transmetim të drejtpërdrejtë në televizion. Përsa i përket sfidës së All Star Game, të gjitha evenimentet në lidhje me të do të zhvillohen në Sharlot, në 16-18 shkurt.

Përvec 10 lojtarëve titullarë, janë zbuluar edhe fanelat që ata do të veshin për këtë ndeshje. Dizajni i këtyre fanelave është i ngjashëm me atë të vitit 1991 kur Sharlotë për herë të parë u bë vendi që priti All Star Game. Për t’i bërë një homazh skuadrës së vendit që pret këtë sfidë, në uniformat e skuadrave shfaqet edhe logoja e folesë së bletëve.

sfidanti.al