Na fal Ukrainë, por kemi “luftën” tonë! Vetëm kështu mund të shfajësohet FSHF dhe presidenti Duka për atë që ka ndodhur në orët e fundit. Ndeshja me Rusinë, në kuadër të Ligës së Kombeve, nuk do të luhet, për shkak të masave dhe sanksioneve ndaj Rusisë për pushtimin e Ukrainës. Për këtë mund të thuhet “ bravo Shqipëria”! Por vendimin nuk e paska marrë FSHF dhe “kryeministri” i shtetit të lodhur të futbollit, zoti Duka , por Ministrja e Jashtme , Olta Xhaçka. E kishtë bërë Federata e Futbollit në Poloni, pa pritur vendimin qeveritar, madje sulmuesi emblatik i tyre , Levandoski, kishte qënë i pari në reagim: “ Si mund të luanim me Rusinë, kur ata po zaptojnë Ukrainën dhe po trondisin paqen botërore..”

Po ku ta ketë mëndjen Federata jonë: tek lufta “e largët” në Ukrainë, apo tek lufta e saj që ka plasur , ku si tanke janë shoqatat , por më të fortë dolën antitanket..gjykatat! Dhe kjo është lufta më e besueshme në këto 20 vite, qyshse ndodhi “pushtimi i topit” . Kishim vite që e prisnim dhe erdhi më në fund: një ndeshje “derbi” midis Shtetit të madh dhe shtetit të llastuar që krijoi “qeveria e futbollit”.

Dhe dita e madhe po troket , por sa më shumë afron ora, aq më shumë rritet frika.Nesër, sikur të ndodhi, mund të shpallet e “marta e zezë” nëse federalistët do të mblidhen për të bërë Asamblenë e mbijetesës duke kundërshtuar vendimet e Gjykatave, duke injoruar edhe një herë, atë që nuk kanë njohur në këto dy dekada..ligjin !

Sfidanti.al