Ronaldo me 3 gola apo arbitri Kasai me gafat e tij, cili ishte heroi?

Kurrë më parë nuk kishte ndodhur që kur të përballeshin dy perandori në futboll si Reali i Madridit dhe Bajerni i Mynihut , fatin e ndeshjes ta përcaktonte “djalli”,  apo me një shpjegim më tokësor.. pazotësia e një arbitri që meriton të kujtohet me frikë në nivelet e larta. Arbitri Kasai ka guxuar shumë, madje ka tejkaluar orbitën  e  gabimeve të lejuara, duke  tjetërsuar edhe trajnerin më të qetë në Botë, në një  “vullkan” që zien nga brenda. Trajneri Ançeloti  e ka përjetuar  dramën spanjolle me një shtrëngim në zemër: nga  iluzioni i përmbysjes së Bajernit të tij,  kur kryesonte në “Bernabeu” me meritë 1-2, tek një fund tragjiko-komik me 4 gola, të cilët  nuk ishin vetëm meritë e ‘diktatorit” të golave, Ronaldo.  Maviola “pikon” gjak bavarez,  madje 2 gola të Realit  nuk morën bekimin e Zotit dhe kartoni i verdhë i dytë, ai që flaku nga ndeshja Vidalin,”grali i ndeshjes”,  ishte një shpikje e padenjë për një superndeshje që u vra mu në zemër të tempullit me emrin e lavdishëm ..Bernabeu.

I kanë bërë një pyetje me helm Zidanes në fundin e ndeshjes, i cili mbetet një kampion i madh edhe kur ‘djalli me bilbil” mendon për  ta shtyrë  më shumë ruletin e fatit të tij:  cili ishte heroi i vërtetë i ndeshjes Ronaldo  me 3 gola apo arbitri Kasai, i cili me vendimet e tij ka paralizuar edhe mëndjen e gjithë atyre që votonin kundër maviolës në fushë? Sa ironike ngjarjet,  kur kujton se edhe vetë trajneri Karlo Ançeloti  ishte një nga besimtaret kundër maviolës, që fill pasi preku fundin e detit në “Bernabeu”  ka korrigjuar bindjen me stilin e tij lakonik: “  Nuk kam qënë kurrë për maviolën në fushë,  por u dashka paguar një çmim shumë i shtrenjtë për të ndryshuar mendim..”

Sfidanti. al