Nuk keni frikë nga Partizani, po kur luan UEFA..ia anulojmë dot golin

Koicidencë fatale, nga ato që ngjasin shpesh në futbollin shqiptar, për sa kohë që për golat nuk mendojnë vetëm futbollistët në fushë, por edhe perënditë e këqija. Atë natë, fill pas emisionit “Procesi Sportiv”, dy presidentët, Gjici i Kukësit dhe Demi i Partizanit, i kanë bërë një telefonatë Starovës me një pyetje ngacmuese: “ Si t’u duk penalltia e Skënderbeut në Shkodër?”. Përgjigja ishte lakonike: “ Shenjë e keqe..”. Që do të thoshte se Zotat nuk e kishin braktisur Skënderbeun, aq më shumë misionarët që dërgojnë në fushë, kanë apo s’kanë stemë të FIFA-s. Më e bukura,  dy presidentët harruan t’i bënin edhe një pyetje shtesë Starovës: “ Po për ndeshjen Partizani-Kukësi, cila është parandjenja e tij? “

Më shumë se një shenjë e keqe, nëse do t’i afroheshim ndopak gjuhës me të cilën kategorizoi penalltinë e Shkodrës, ajo që pritet të ngjasë me “demat”, do të jetë një strategji me helm. Në një kampionat ku “magjia e zezë” përpin gola të pastër  dhe penallti flagrante, nuk është qameti kur mendon atë që u sajua mes Partizanit dhe Kukësit, sidomos golin e kulluar të Ekubanit. Jeta në fushë mund të jetë edhe më e tradhëtuar në javët në vazhdim. Partizani pretendon titullin kampion, ndërkohë ka zgjedhur një rrugë tjetër, krejt të panjohur në kampionatin tonë, duke rebeluar kundër regjimit që po i shtrëngon fytin topit. Në sulm kur flitet për UEFA-n, në krye kur flitet për fondet e Solidaritetit, përsëri në sulm kur të ringjallet këto ditë mundësia e ridënimit të Skënderbeut për blasfeminë e trukimeve. Në 4 mandatet, që presidenti Duka hedh vallen me prepotencë, me një shpërfillja kampione për kundërshtarët, madje duke bërë dashuri me politikën, vjen çasti më delikat për pronarin e lodrës, sa edhe drita po mungon në fund të tunelit. Gola edhe mund të anulohen, siç ka ndodhur rëndom këto vite, puna është se UEFA e re, kjo e Ceferinit ka zgjedhur të luajë mbi “dosjen S”, ose më qartë dosja shqiptare, për të cilën thuhej se kishim marrë garanci për hir të votës që u dhamë. Shqipëria e futbollit, ajo që u këshillua të vazhdonte festën për Europianit dhe të harronte sa më shpejt molepsjen e trukimeve, plagën që u injorua me frazën e paskrupullt zyrtare “ janë vetëm dyshime”, duhet të presë infarktin se UEFA vetëm nxemjen paska bërë me fatin tonë. Me heronjtë, që as nuk e kuptuan se vala dehesë e Francës, paska qënë fundi i një dasme, ku shqiptarët u lejuan të bënin ç‘të donin para se me ta te mereshin seriozisht. Sido që të jetë, prapë jemi me fat kur mendon se “Grali i Shenjtë”, sekreti si u gjëndëm  në Francë, mbetet midis nesh si një vepër arti, që më shumë na bashkoi…

 

Gëzim Sinemati