Sikur të kishte një emision televiziv “ Kampionate të humbur” , sa prekëse  do të ishte ajo pjesa në studio kur prindi, zyrtarët e FSHF-së, dhe Superliga, fëmija e tyre,  do ta mbyteshin me lotë, edhe pse e kishin sajuar vetë ndarjen e gjatë.  Një ndarje krejt shqiptare, nga ato që Europa  nuk na ndihmon dot, ngaqë ajo  na përgjon vetëm kur  tradhëtojmë lojën,  për  datat dhe oraret e ndeshjeve janë gati të thonë “ vritni veten, bëni ç‘të doni.  Në një kampionat  pa kohë, ku akrepat e orës nuk thonë të vërtetën,  pse u dashka që të shqetësohemi se futbolli bën si i vdekur , por do të ngjallet në fillim shtatori.  Një ngjallje e bukur, mbresëlënëse,  për ata që besojnë akoma se Superliga është një shkollë me stil unik , dite apo nate qoftë,  dhe si e tillë, meriton t’i hapë dyert  në një kohë me shkollat e tjera. Kështu, është tepër ngushëllues fakti që akoma nuk kemi zbritur në fushë, pale kur dëgjon komplimentin  që vjen nga Europa, se kur kampionati shqiptar nuk fillon, ata duken më të ndershëm sesa kur topi  u vardiset pranë këmbëve.

E mirë apo e keqe, Superligë  apo ka raste kur trukohet  si super-shtrigë, siç ndodhi në fundin e kampionatit,  ne e dimë të gjithë se fundin e kemi “hollivudian”.  Këtë radhë skenari i do të jetë edhe më mbresëlënës, më i besueshëm, por edhe më i shpejtë. Aq i shpejtë sa disa oborrtarë e kanë krahasuar  dinamiken me garat e Usain Boltit, i cili  niset me vonesë nga starti dhe pastaj kthen kokën pas duke u tallur me kundërshtaret . Edhe Superliga do të çmëndet nga gjysma e garës dhe do  të përqeshë gjithë Europën, e cila tani gëzohet para kohe, sepse s’i shkon mendja se do te  luajmë nga tri ndeshje në javë . Kuptohet, s’do të ketë shumë bukuri, por prologu do të jetë krejt i pabesë. Edhe më  i keq si sezoni i kaluar. Është viti i Botërorit dhe “trofeu” nuk do të jetë kualifikimi, por që të zemë të parët vendin  në divan.  E  kishin pyetur “regjizorin”, cili do të jetë fituesi në fund, na trego se kush pret fundin. Si një mjeshtër i madh aktrimi, ku fituesin nuk ia lexon dot në fytyrë,  jep një përgjigje që vlen si biletë për të parë filmin e radhës: “ Të gjithë vriten, mos e kërkoni fituesin në fushë..”

Gezim Sinemati

Botuar ne gazeten Panorama