Shqipëria U21 pritej të zhvillonte një duel dinjitoz ndaj moshatares së saj të Francës, në “Selman Stërmasi”, por përfundimi ishte diçka krejt tjetër. Optimizmi i madh i trajnerit Alban Bushi (që edhe tipin e tij e ka super optimist) këtë herë nuk iu përgjigj realitetit dhe raportit të forcave, ndaj edhe skuadra shqiptare duhet të ridimensionohet. Franca U21 fitoi 3-0 në kryeqytetin tonë, duke dominuar ndeshjen dhe madje duke mos u lodhur shumë në pjesën e dytë.

Muse shënoi dy herë në pjesën e parë dhe Siebatçu shpejt pas pushimit për të treguar gjithë klasin e njërës prej skuadrave më të forta të Europës. Pas disfatës së turpshme të kombëtares në miqësoren në Luksemburg, ja ku vjen edhe “kripa në plagë”, pra humbja e Shpresave. Tani, pritet ndeshja zyrtare eleminatore e Europianit ndaj Estonisë, në “Elbasan Arena” në 12 qershor, për të parë sesi do të mund të konkurrojë skuadra e “Lokut” në grupin e vet.

Sfidanti.al