Ka luajtur më shumë se 440 ndeshje si futbollist profesionist, veçse nuk ka shënuar shumë gola. Rafael Varan nuk është si Sergio Ramos, shoku dhe kapiteni i tij tek Reali i Madridit, që edhe pse mbrojtës sheh nga porta kundërshtare, veçse francezi këtë herë i përngjau kolegut të repartit difensiv. Të dy golat në fitoren e rëndësishme 2-1 në fushën e Hueskës ishin të Varanit, duke qenë këto edhe 2 rrjetat e para të sezonit. Interesant fakti se qendërmbrojtësi francez kaq e ka rekordin e sezoneve, me 2 gola në kampionat, gjë që e ka bërë 4 herë, ndërsa ia ka dalë në 3 sezonet e fundit radhazi.

Në mungesë të Ramosit, ishte ai që mbajti peshë skuadrën duke qetësuar Zidanin që ishte tepër i shqetësuar dhe i nervozuar pas kritikave mediatike dhe presionit të rezultateve. Për më tepër, Varani përmbysi shifrat pasi Hueska kaloi e para në epërsi në pjesën e parë. “Ne treguam karakter, – tha Zidan më pas, – skuadra jonë tregoi se di të reagojë në momente të vështira”. Problemi është se nuk e bën dot shpesh, ndërsa Zidani kritikohet se mbështetet shumë tek të vjetrit si … Varan. Në të vërtetë, kampioni i botës është vetëm 27 vjeç, por ka shumë përvojë duke qenë që luan tek Reali që në vitin 2011 kur ishte 18 vjeç. “Me kokë dhe me zemër” e komentoi ai vetë paraqitjen që bëri me Hueskën në reagimin e postuar në Instagram.

Sfidanti.al