Problem nuk e kemi vetëm kur vjen puna për marrë onlajn shërbimet për pensionin. Shqiptarët duket se do të dëmtohen mjaft nga mungesa e familjaritetit me aplikimet përmet internetit edhe përsa i përket finales së Ligës së Konferencës. Në 25 maj do të luhet finalja në “Arenën Air Albania” dhe numri i tifozëve nga Shqipëria është mjaft i ulët në krahasim me numrin e përgjithshëm. Deri përpara sesa të luheshin gjysmëfinalet, pra deri të enjten, informacioni ishte që kishin aplikuar vetëm 1 700 shtetas shqiptarë, në krahasim me rreth 13 000 aplikime gjithsej. Të shtyrë nga tradita e shumë dekadave, ende me qindra e mijëra shqiptarë që jetojnë në vend, vazhdojnë të këmbëngulin për të gjetur bileta nëpër sportele apo me miqësi personale. Organizatorët sqarojnë se finalen e organizon UEFA dhe se procesin e shitjes së biletave po ashtu e ka ky organizëm. Një mëkat i madh sepse UEFA e ka bërë të qartë se tifozët shqiptarë do të kenë përparësi në pranimin e aplikimeve onlajn. Sidoqoftë, kemi ende shpresë që të mos dalim pa gjë, sepse një tjetër informacion është që për tifozët nga Shqipëria mund të rezervohen të paktën 4 000 bileta.

Sfidanti.al