Stoli nuk do të jetë bosh, por aty nuk do të ulet ai që ishte numri 1. Niko Kovaç është larguar dhe Bajerni do të ketë ndeshjen e parë në Bundesligë pa kroatin, kur të presë sot Dortmundin në “Alianc Arena”. Luhet në 18:30, dhe bavarezët pritet të mos e kenë të lehtë ndaj verdhezinjvë, tani që drejtimin e ka marrë numri 2, Hans Flik, veçse vendasit kanë një alternativë që jep plot shpresë.

Ky është Robert Levandovski, sulmuesi i Polonisë që ka marrë “zjarr” së fundmi, dhe që u bë i pari lojtar në historinë e Bundesligës që shënon gol në secilën prej 10 ndeshjeve të para të sezonit. Në total, ai ka 14 rrjeta, dhe mungesa e Kovaçit nuk do ta pengojë sado pak aftësinë e tij për të realizuar edhe në portën e Dortmundit.

Borusia vjen me moral të lartë, pas barazimit me Shalken në kampionat, fitores 3-0 po në Bundesligë ndaj Volfsburgut, suksesit 2-1 në Kupë ndaj Mynshengladbahut, dhe përmbysjes së madhe 3-2 ndaj Interit në Champions. Anglezi Xhejdën Sanço është në dyshim, por ekipi i trajnerit Favre ka plot të tjerë. Në Mynih nuk fitohet që nga viti 2014, kur trajner ishte Klopi, ndoshta kjo është hera e duhur!

Sfidanti.al