Luis Hasa është një nga talentet e rinj shqiptarë që po tërheq gjithnjë e më shumë vëmendje në futbollin italian. Mesfushori i lindur në vitin 2004, aktualisht në pronësi të Napoli, po kalon një moment vendimtar në karrierën e tij, pasi pas një sezoni pozitiv në huazim te Carrarese, e ardhmja e tij mbetet e hapur mes qëndrimit, huazimit të ri apo një hapit të ri në Serie A. Sipas raportimeve të merkatos, Hasa është futur në radarët e disa klubeve italiane, ndërsa Napoli po e vlerëson me kujdes strategjinë më të mirë për zhvillimin e tij. Mesfushori konsiderohet një projekt afatgjatë dhe klubi nuk dëshiron të nxitojë me vendimin përfundimtar.

Te Napoli, Luis Hasa shihet si një lojtar me potencial të lartë, por ende jo i gatshëm për rol titullari në ekipin e parë. Klubi napolitan po ndjek politikën e zakonshme me talentet e reja: minuta të rregullta dhe zhvillim gradual. Ideja kryesore është që lojtari të mos mbetet pa hapësira, ndaj në tavolinë janë dy skenarë: ose një huazim i ri në një skuadër të Serisë A ose Serisë B, ose testimi i tij gjatë fazës përgatitore verore për të vlerësuar nëse mund të integrohet në skuadrën e parë. Në çdo rast, Napoli e konsideron Hasën pjesë të projektit afatgjatë dhe nuk ka ndërmend ta largojë përfundimisht.

Interesi për Hasën në merkato është real dhe në rritje. Sipas mediave italiane, Cremonese ka bërë një sondazh konkret për të kuptuar mundësinë e një huazimi të mesfushorit për sezonin e ardhshëm. Klubi e sheh atë si një profi l ideal për projektin e ri, me fokus te lojtarët e rinj dhe zhvillimi i tyre. Në garë është edhe Hellas Verona, e cila po ndjek situatën me kujdes dhe mund të ndërhyjë në momentin që Napoli hap derën për largimin e tij në formë huazimi. Përveç këtyre dy klubeve, edhe skuadra të tjera të Serisë A dhe Serisë B kanë marrë informacion mbi situatën e lojtarit, duke e bërë atë një nga emrat më të kërkuar të brezit të ri në mesfushë.