Kur nis një kthesë të fortë në një ligë të madhe, përse të mos mendosh për gjëra të mëdha? Në këto “ujëra” është edhe Etrit Berisha, portieri i kombëtares shqiptare, që arriti një tjetër fitore në Serinë A me Atalantën. Pasi i “bëri gjëmën” Interit, skuadra nga Bergamo “varrosi” edhe Lacion, madje duke e “pushkatuar” që në minutën e parë.

Goli i Duvan Zapatës bëri që të fitohej ndeshja 1-0 dhe që Atalanta të ngjitej në kuotën e 24 pikëve, mu në mes të skuadrave që luftojnë për vendin e katërt, pra për kualifikim për në Champions. Ekipi i Berishës dhe i trajnerit Gasperini ka 7 fitore e 3 barazime në 16 javë, dhe një golaverazh shumë pozitiv, 30-20, pra ka shënuar më shumë sesa Interi, Roma, Milani dhe Lacio.

Vetë Berisha është rikthyer titullar, pra njëri nga protagonistët kryesorë, ashtu si sezonet e kaluara dhe vlerësimet nuk mungojnë. Portieri shqiptar nga Kosova provoi Ligën e Europës, ndërsa tani shpreson të shijojë Championsin. Mbrëmjen e djeshme, ai fitoi duelin brenda kombëtares, me portierin tjetër, Tomas Strakoshës, që ishte titullar në portën e Lacios.

Sfidanti.al