Në Hungari, Austri dhe në Greqi, këto ishin koordinatat shqiptare në fundjavën europiane të futbollit. Myrto Uzuni, Bekim Balaj dhe Ergys Kaçe ishin autorë golash, dhe skuadrat e tyre patën përfundime pozitive. Uzuni realizoi në kampionatin hungarez, në fitoren 3-1 të Ferencvaroshit ndaj Dioshgjorit, duke qenë autor i golit të tretë. Kjo ishte rrjeta e tij e dytë në Superligë, dhe e pesta në sezon duke përfshirë dy në raundet eleminatore të Championsit dhe një në fazën e grupeve.

Balaj nuk pati mundësi të ishte kaq shumë protagonist, edhe pse ka qenë pak ditë më parë. Sulmuesi shkodran shënoi golin e katërt në fitoren 4-0 të Shturmit të Gracit në fushën e Austrisë së Vjenës, dikur një skuadër e madhe austriake dhe europiane. Në 28 nëntor, Balaj kishte shënuar golin e fitores në një tjetër ndeshje të Bundesligës austriake. Së fundmi, edhe pse jo për nga rëndësia, Ergys Kaçe. Mesfushori, që ende cilësohet si pjesë e “rrethit të kombëtares”, nisi reagimin e Arisit të Selanikut në fushën e Atromitosit. Vendasit kryesonin 2-0 dhe ai shkurtoi diferencën, ndërsa në fund, ndeshja e Superligës greke u mbyll 2-2.

Sfidanti.al