Edi Reja merr “bekimin” nga Vatikani, pas “votëbesimit” të Dukës tek Shqipëria!

Si lajm të mirë pati konfirmimin me Shqipërinë, ndonëse mbetet me karton të verdhë. Edi Reja, gjithsesi, ka marrë pushimet nga kombëtarja kuqezi, por pikërisht këtë të diel u angazhua në një ndeshje të veçantë. Në Romë u organizua një sfidë bamirësie mes një ekipi të përbërë nga punonjës të Vatikanit dhe një përfaqësueseje të Organizatës Botëror të Romëve. Presidenti i Lacios, Lotito, dhe drejtori sportiv, Igli Tare, i bënë ftesë Rejës që të ishte për një ditë trajner i ekipit të Vatikanit.

Ashtu edhe u bë dhe ndeshja u luajt në kompleksin stërvitor të Lacios.

“Ishte një uniformë speciale si trajner i skuadrës së Vatikanit, – tha Reja, – presidenti i Lacios, Lotito, më telefonoi dhe unë e pranova ftesën me kënaqësi, sepse doja të takoja edhe miq të vjetër që nuk i kisha parë që kur u largova nga Lacio. Përsa i takon skuadrës së Lacios, më pëlqeu ndaj Juves, edhe pse humbi. Kënaqësia ime më e madhe në karrierën si trajner ishte fitorja e derbit në minutën e 93-të me golin e Kloses”. Ishte 31 marsi i vitit 2011, kur Lacio triumfoi 2-1 ndaj Romës në stadiumin “Olimpiko” me golin e sulmuesit gjerman, pikërisht në frymën e fundit, ndërsa Edi Reja shpërtheu në ekstazë.

Sfidanti.al