Kanë përfunduar 2 ndeshjet që hapën javën e 16-të të kampionatit Abissnet Superiore në rrjetin e Radio Televizionit Shqiptar. Partizani mposht 2-1 Flamurtarin në “Arenën e Demave”, ndërsa në “Elbasan Arena”, një gol i Ze Gomesh në minutat shtesë i jep një fitore të çmuar Elbasanit përballë Vorës.

E bukur, plot emocione dhe raste ka qenë sfida e mes Partizanit dhe Flamurtarit. Vlonjatët kanë disa mundësi të mira për të kaluar në avantazh, por golin e gjejnë vendasit, që shënojnë në pjesën e parë me Isgandarlin.

VAR-i bëhet protagonist në pjesën e dytë në “Arenën e Demave”, ku akordohen 2 penallti. Fillimisht vlonjatët barazojnë me Markun, por më pas sërish nga 11-metrat Skuka kalon në avantazh “të kuqtë”.

Mbyllet 2-1 për Partizanin një ndeshje e bukur dhe e luftuar. “Të kuqtë” marrin fitoren e tretë radhazi në kampionat dhe ngjiten në kuotën e 23 pikëve në klasifikim, ndërsa vlonjatët ngelen në kuotën e 13 pikëve në vendin e parafundit në renditje.

E bukur ka qenë edhe sfida mes Vorës dhe Elbasanit. Verdheblutë fitojnë në frymën e fundit, falë një goli të shënuar nga Ze Gomesh në kohën shtesë. Elbasani fiton 1-0 dhe ruan kreun e renditjes, tashmë në kuotën e 32 pikëve. Vora “dorëzohet” në fund dhe pëson humbjen e radhës në kampionat.

sfidanti.al