Shumë zhurmë për  asgjë, ose shume zhurmë për 1 pikë. Ndeshja e bujshme në letër Partizani-Kukësi  në fushë nuk kishte shumë histori, nuk kishte spektakël, madje me ironikë është fakti se më i fituar doli Skënderbeu  sesa palët që  u përballën. Nuk ka dyshim se Partizani ishte më i intereresuar se Kukësi për ta fituar ndeshjen, mbajti shumë peshë  gjatë gjithë ndeshjes por nuk mjafton vetëm Ekuban për të mundur një rival që e quan aset faktin që nuk ka provuar ende humbjen e parë në kampionat. Edhe pse për Kukësin kjo që ndodhi mund të ketë shijen e preferuar, sidomos për trajnerin Gjoka, ekipi  është treguar shumë  inferior, pa patur kujdesin për të marrë stafetën e e 90 minutave për ta fituar këtë sfidë.

“ Nuk mbaj mend sa herë erdhi Kukësi në portën tonë gjatë gjithë ndeshjes” – ka thënë Starova në fund të ndeshjes, por kjo nuk mjafton për të justifikuar fundin e një ndeshje, për të cilën Partizani ishte i dënuar ta fitonte.  Edhe pse kronika ka qënë në favor të tyre, duke parë “demat” që kërkonin më shumë se kundërshtari i tyre për ta fituar ndeshjen,  duket tepër ironik fakti që nga  ndeshja më shumë përfituan kampionët e Skënderbeut.   Paska qënë iluzion i rremë goli i Kukësit me Dvornekovic në  minutën e 21-të  që dërgoi  ekipin e Gjokës në avantazh, madje  fantazia për një ndeshje që kishte “mallkuar’ barazimin u krijua edhe nga barazimi qysh në frymën e parë të pjesës së dytë me anët të Ekubanit në minutën e 46-të.  Tani mund të thuhet pa frikë, bile paskemi qënë të gabuar që nuk besuam deklaratën e përbashkët të dy trajnerëve Starova dhe Gjoka kur njëzëshëm thonin se “ po na dridhen këmbët”.  Pas asaj që ndodhi,trajnerët ndanë nga 1 pikë, Skënderbeu përfitoi nga frika e rivalëve për  të treguar  dhëmbët e fituesit , ndërsa tifozët provuan edhe njëherë se ndeshjet e mëdha në letër janë ndryshe kur shkruhen në ..fushë.

Sfidanti.al